赢即出线输要降班

周日晚欧国联A4组焦点战，英格兰主场同克罗地亚上演生死战。克罗地亚上仗击败西班牙后，令呢场煞科战成为两队「成王败寇」嘅关键赛事，为避免降班，兼勇夺小组出线资格，双方料会全力抢攻力争3分，中位数2.5球入球大值得捧场。

「格仔兵团」克罗地亚上仗击败西班牙之后，令Ａ4组形势变得格外紧凑，赛前已经踢晒4场比赛嘅西班牙虽然得6分暂居首位，不过各得4分嘅英格兰同克罗地亚，只要喺呢场生死战赢到波，就可以压倒西班牙抢得出线资格，相反输波嗰队就会包尾降班。

如果比赛和局收场，咁边队降班？由于英格兰首循环作客0比0闷和克罗地亚，如果今场再出现同样比数，对赛成绩相同嘅情况下，克罗地亚就会衰得失球较差而降班。不过如果系有入波嘅和局，英格兰就会因较少对赛作客入球降班。

双方射手近况都勇

无论如何，近期走势唔错嘅「三狮军团」，攻力绝对有番咁上下，尤其般尼茅夫前锋哥林威尔逊，首次入选就喺处子骚入波，成为英军头号射手哈利卡尼之外又一得分能手。而「格仔军团」虽然有中场大将拿杰迪锡受伤倦勤，不过比列锡同列比锡等进攻好手状态神勇，喺核心莫迪历带领下，有力同英格兰上演入球骚，中位数2.5球入球大唔好走寳。