今晚英超爆发「双蓝会」，「2哥」车路士主场火併「拖肥糖」爱华顿。车仔王牌夏萨特已经伤愈复出，败家仔艾华路莫拉达亦重拾射门鞋，不过「拖肥糖」前锋李察利臣同样弗爆，斗攻格局捧中位数2.5球入球大更佳。

夏萨特复出火力更猛

连埋上场联赛赢水晶宫3比1在内，车仔新帅沙利喺首11轮英超取得8胜3和，追平左前诺定咸森林主帅法兰克奇勒喺1994年所创、首度带队出战英超头11轮未输过嘅纪录，今场只要唔输即可刷新纪录。之前受背伤困扰嘅车仔王牌夏萨特，喺上周中欧霸赢巴迪已经复出，沙Sir仲喺下半场中段换走佢，摆明锡住呢位球星留力今场。而箭头基奥特喺对巴迪一箭定江山，自今年5月之后首度入波，势必激起另一前锋艾华路莫拉达嘅战意，呢位早前坚败家嘅西班牙射手，近4场联赛入4粒，重拾信心，眼见基奥特打破入球荒，佢为保正选位必定落多几钱肉紧争士哥。

爱华顿主帅马高施华一向崇尚进攻，巴西前锋李察利臣自刑满复出，近4场联赛共入3粒，现时喺联赛有6球进帐，位居射手榜前列。不过「拖肥糖」今季5场联赛作客场场都有失波，共失9粒，其中4次开3球或以上，防线唔多稳阵，而车仔近4场联赛狂轰12粒，相信今场大家都会踢得几开放，入球大稳开。