国家打吡第120回

今晚直播焦点战役，当然系多蒙特同拜仁慕尼黑合演国家打吡，呢场系第120次德国打吡，拜仁有56胜33和30负嘅对赛优势，两军近3次交锋都系拜仁胜出，不过今时唔同往日，多蒙特喺新帅法夫尔带领下踢出悦目进攻足球，前线攻击群轮流爆发火力惊人，英格兰翼锋查顿辛祖同西班牙射手柏高艾卡沙近期红遍德甲，两人首次参加国家打吡，必定会向拜仁显颜色。拜仁近期状态欠佳，新帅尼高高华面临巨大压力，加上阵容不整，作客西法伦球场冇本钱让波，推介多蒙特让球主胜。

多蒙特现时以7胜3和佳绩排德甲榜首，欧联亦已稳得小组出线资格，刚战作客马体会虽然以两球落败，但明显留力等呢场大战，睇番佢的较早前主场大炒马体会4蛋，前线攻击群表现清风送爽，除左灵魂马高列奥斯回复水准外，两位新贵查顿辛祖同柏高艾卡沙近期连场表现Sharp醒交足功课，球队火力冠绝德甲，阵中只有左闸舒姆沙养伤，中坚艾度迪亚路上阵成疑，其馀主力伤疲尽起，今晚喺西法伦主场布阵可谓信心十足。

洛宾操练受伤上阵成疑

拜仁今季联赛已经输左两场，目前只排第3位落后多蒙特4分，得球比多蒙特少12球，失球亦多1球，证明攻守表现都确实唔理想，新帅尼高高华被批评唔够料，更重要嘅系阵中多名德国国脚喺世盃后，始终无法恢复最佳状态，包括汤马士梅拿、晓姆斯、谢路美保定甚至门将纽亚嘅表现都远逊全盛期，而且中场受伤兵问题困扰，堤亚高艾简达拿、哥伦天杜利素同京士利高文仲养紧伤，原本被安排喺欧联休息嘅翼锋洛宾，又唔好彩喺操练中受伤，今晚上阵机会唔太乐观，拜仁现时中前场可用人手其实相当短缺，今晚无论秤状态同人脚都佔唔到优势，作客让波实在有啲过分。