背负伤痛首返王权球场

今晚英超有连场大战，但焦点所在相信系李斯特城主场王权球场对般尼一仗。早前因直升机失事坠毁而痛失球会主席维猜嘅李斯特城，今仗系意外发生后首度重返伤心地，一班球员肯定化悲痛为力量，务求继上仗击败卡迪夫城后，再将胜利献畀深受球迷及全队上下爱戴嘅维猜。

距离坠机意外已经超过1周，王权球场外球迷悼念时所留下嘅花圈，几乎完全包围成座球场，不过相信李斯特城球会上下同佢的嘅球迷，甚至当地嘅居民，都未平复到维猜离世嘅悲痛心情。

作为班主，维猜曾将多年喺英冠沉沦嘅「李城」带上英超，更喺15/16赛季「童话式」称霸英超，上演近代世界球坛奇迹。球场外，佢大力支持球会所在地李斯特城嘅各项民生建设，绝对系少有成功融入当地社区嘅外国班主，正因为咁，佢嘅离世先更令人惋惜。

上下半场披不同波衫

早前李斯特城就表示会将球会慈善基金会嗰命，改成以维猜命名向佢致意，头号前锋占美华迪亦都拍卖左由自己所拥有嘅球场包厢，同上仗联赛上阵时佢所着嘅球靴，为该基金会筹款。而呢场比赛赛前，全场除左会为呢位已故班主默哀2分钟，「李城」球员今日比赛时，上下半场会着两款波衫，上半场先着綉有维猜名字嘅战衣，到下半场就会改着「国殇纪念日」嘅球衣上阵。

球赛喺生离死别面前，霎时间显得微不足道，不过无论如何，生活依然要继续，今场返到距离坠机意外现场唔远嘅王权球场，对「李城」球员难免会有影响，不过上轮佢的顶住悲痛心情，作客1比0小胜卡迪夫城，足见战意未畀惨痛现实打垮。李斯特城上周远征完卡迪夫后，匆匆飞去泰国出席维猜丧礼，但领队佩尔喺记者会上表示，此举对球队上下非常重要：「无错系一次好长嘅旅程，对操练有影响，但今次系球员表达对维猜家庭嘅支持，我的上下一心！」作客嘅般尼向来以稳健防守见称，不过今季表现大不如前，近3仗联赛输晒兼劲失13球，难有本钱抢分，一于支持李斯特城踢好波献维猜。