2013年打过官司变世仇

两军大本营都喺莱茵河下游，但绝对唔friend，仲喺2013年打过官司，当时杜塞尔多夫向慕逊加柏借用后卫杜比亚斯李维斯，合约列明借用费每年5万欧元，借用期满杜塞尔多夫有权以20万欧元买断，结果杜军借用完1年后决定收购，但只畀左买断费，之前嘅借用费就缩骨唔肯畀，结果因为小额金钱要闹上法庭，自此之后慕逊加柏每逢呢个打吡戏码都唔客气，睇番佢的近8次主场对杜塞尔多夫7胜1和，当中有6次炒对手两球或以上，而且大比数纪录甚多，证明佢的几咁讨厌呢个贫穷邻居。

慕逊加柏岩岩喺德甲同德国盃连败，两场共失8球，球队急于反弹。好在佢的主场踢德甲一向有保证，除左系今季唯一主场全胜球队（4场），仲已经跨季7连胜，今晚更有高价射手柏利亚伤愈候命，当然希望尽炒死敌啦。

杜军王牌射手仲未开斋

杜塞尔多夫系上届德乙冠军，但升班都无力扩军，计全队身价系全德甲最平一队，佢的升班后最贵收购，系以200万欧元买入左上届德乙神射手杜基斯治，呢位24岁多蒙特青训产品，上季为基尔取得18个入球，不过佢嘅能力亦正好系杜塞尔多夫嘅写照，喺德乙打横行，上到德甲就完全唔掂，今季佢9轮联赛都有踢，至今仲未开斋，人生仲未试过喺德甲入波，加上球队近5轮德甲全败，近4轮每场最少都输两粒，今晚作客好可能再被大炒。