分心欧联见好就修

周日晚上英超大战，曼城将会主场面对修咸顿。卫冕联赛嘅曼城踢法愈趋成熟，唔会再好似以前咁样一味抢攻，宁愿稳袋3分更实际，尤其「蓝月亮」嚟紧周中要踢欧联，估计呢场拎到「燕梳球」就会收缰，中位数3.5球嘅入球细唔好错过。

上季强势勇夺英超冠军嘅曼城，今季保留大量主力，只获天才攻击手马列斯加盟，不过实力依然超晒班，联赛开咧10轮取8胜2和，狂轰27球仅只失过3球，劲到冇朋友。而且比起上季，「蓝月亮」今季明显更注重结果，唔求场场大炒，只要3分稳袋就算，上仗联赛喺场地条件欠奉嘅情况下，依然以1比0击败劲敌热刺，尽显王者风范。虽然中场主力奇云迪布尼喺英联盃打正选竟即时又受伤，好彩马列斯够弗应该顶到档，加上丹尼路雷斯、文加拉、根度简等伤兵已复操，今仗只要早早稳住胜局，随时会畀呢班球员落场轻抒脚头，相信入波都会系一球起、两球止。

修咸顿前线死晒火

相反喺下游挣扎嘅「圣人」修咸顿，自9月击败水晶宫后，前锋丹尼艾格斯、沙恩朗、查理柯士甸同加比亚甸尼齐齐哑火，联赛连盃赛法定时间近7场未赢过，其中5场仲食白果，唯一庆幸系后防未至于崩溃，近10仗联赛9次开3球或以下，呢场面对超晒班嘅曼城，惟有输少当赢，捧返中位数3.5球入球细好过。