阿苏做主角送洛帅一程

周日晚上西甲大战，巴塞隆拿主场同皇家马德里上演今季首次西班牙「国家打吡」。「银河舰队」今季表现大失水准，搞到「舰长」洛佩特吉帅位危危乎，呢场作客面对死敌兼联赛1哥巴塞好难过到骨，一于捧主胜。

美斯同C朗喺西甲斗足咁多年，一直系「国家打吡」嘅焦点，可惜美斯早前手部受伤，令呢场系继2007年之后，11年以嚟首次双方正选阵容冇「斯C」嘅打吡战。

虽然冇左两位风头趸，不过呢场传统大战依然充满话题性，皆因由前西班牙国家队主帅洛佩特吉领军嘅皇马，近4仗联赛惨吞1和3负劣绩，士气同状态都跌落谷底，喺联赛榜暂列第7，昔日「银河舰队」嘅王者风范荡然无存，要求高又威惯嘅皇马球迷梗系唔收货，至于不嬲见风驶舵，跟足舆论做野嘅球会高层，逐渐都对呢位教头失去信心，盛传会长皮里兹赛前透露无论今仗赛果如何，洛帅一样要落镬，「潜台词」即系睇死佢赢唔到啦！洛佩特吉仲点会有心机应付呢场大战呢？

巴塞今季主场未输过

过往皇、巴两军被誉为「西超」球队，其他18支西甲球队都只系陪衬，不过近一、两季佢的嘅优势都明显减弱，皇马现时要做「7仔」不在话下，就连巴塞都只系凭得失球差，压过同市死敌爱斯宾奴做1哥，不过比起近况低迷嘅皇马，巴塞整体表现明显要弗得多，尤其大熟大勇嘅苏亚雷斯，今仗美斯养伤缺阵，呢位乌拉圭射手难得担正做「男一」，肯定加倍搏命，有佢搭住菲腊比古天奴攻坚，加埋日渐成熟嘅艾法美路喺中场较炮，巴塞坐镇今季未尝败绩嘅主场应可KO皇马，等「舰长」洛佩特吉「安心上路」！