奥烧派牌 激活锋线

周二凌晨英超独脚戏，阿仙奴将会主场斗李斯特城。「兵工厂」喺新厂长艾美利带领之下愈踢愈有，尤其一班攻击手嘅入波欲望被激发，火力全开，加上「狐狸」近期作客伦敦都开局抢攻，呢场两队随时一开波就大打对攻战，中位数1.5球半场大捧得过。

艾美利弹性战术收效

「兵工厂」新厂长艾美利季初上任后，开始逐渐将自己嘅执教理念灌输畀一班枪手，其中最显著嘅肯定系令阿仙奴踢得更加直接。虽然艾美利同唔少西班牙主帅一样，都盛行运用短传渗透，由后场组织攻势，不过佢同时都好讲求反击效率，只要有机会出现，阿仙奴就会结合长传急攻战术，向对手发起突击。呢套灵活多变嘅战术，明显好岩拿卡锡迪同奥巴美扬两位枪手正印前锋嘅口味，上仗面对同市死敌富咸，两人就先后梅开二度，帮助球队5比1大胜对手，呢场加埋伤愈复出嘅「奥烧」奥斯尔喺中场派牌，「兵工厂」想数胡真系话都冇咁易。

狐狸作客伦敦易半大

另一边厢，「狐狸」今季建立起以新星占士麦迪臣为核心嘅踢法，呢位年仅21岁嘅英格兰中场表现抢眼，早前更加首次被英格兰领队修夫基召入国家队。有佢搭住经验丰富嘅前锋占美华迪，「狐狸」前场火力都有番咁上下。可惜后场发挥就明显差好多，呢场主力守将兼队长韦斯摩根仲要坐波监冇份踢，防线隐患无穷。李城近5次作客伦敦球队都赢唔到波，其中4次半场就已经开出两粒或以上，呢次挑战「兵工厂」想抢分都惟有以攻代守，入球骚肯定走唔甩，中位数1.5球半场大系好路。