13战12胜 坐底赢两粒

今晚继续上演欧联第3轮分组赛，C组重头戏巴黎圣日耳门（PSG）主场迎战意甲拿玻里。PSG目前落后拿玻里及利物浦排小组第3，想连续7届跻身欧联16强，呢场6分波唔可以甩拖。PSG今季13场比赛唔单止赢左12场，而且全部淨胜2球或以上，PSG让一球照捧上盘。

尼马蓄锐欧联搏杀

PSG上周末主场5比0大胜艾米恩斯，法甲开季10战全胜，喺国内基本上已搵唔到对手，现阶段自然要集中火力喺欧联赛事。PSG首场分组赛2比3作客输畀利物浦，依家只排C组第3位，想攞番出线主动权，今场及下轮两斗拿玻里最关键。睇番PSG对上6届出战欧联分组赛都可以进身最后16强，而且每届分组赛从未试过输多过1场，如果再输都咪话唔危，所以今场更要把握主场优势抢3分。由季初法冠盃起计，PSG今季各项赛事出战13场，唯一败仗就系头先所讲输畀利物浦，其馀12场全部赢晒，而且加埋入左47球，全部都能淨胜2球或以上，完全唔会收缰。王牌尼马上场联赛休息，今场养精蓄锐伙拍基利安麦巴比及卡云尼攻坚，绝对唔愁冇波入。

拿玻里作客差好远

拿玻里上场分组赛1比0击败利物浦，现时以4分高踞榜首，不过拿玻里上届欧联分组赛3场作客全部输晒，就算今届换上新教头安察洛堤领军，首场分组赛面对同组最弱嘅贝尔格莱德红星亦只能闷和0比0，发挥明显唔及主场稳定，更何况，佢的今季喺意甲作客亦曾经输过畀祖云达斯及森多利亚，5场作客联赛只有1场冇失波，遇上实力较强嘅球队明显处下风，今场一于捧PSG上盘。