倒戈曼联例入波

欧联分组赛今明两晚重燃战火，今晚H组瞩目大战曼联主场硬撼祖云达斯，焦点毫无疑问落喺倒戈嘅基斯坦奴朗拿度（C朗）身上。呢位葡萄牙球星之前2次代表皇马倒戈斗「红魔」都有士哥，完全唔会留情面，加上祖记今季表现远比「红魔」稳定，近年对英超球队亦赢多输少，祖记让平半，波童捧上盘。

C朗自从2009年离开曼联后，今次系佢第3次喺欧联对番「红魔」，之前2次代表皇马上阵系喺2012/13年16强，C朗主、客两回合都有入波，包括次回合喺奥脱福射入奠胜一球，助皇马以总比数3比2淘汰曼联。虽然C朗今届首场分组赛对华伦西亚领红被逐，但上场喺佢缺阵下，祖记仍凭保罗戴巴拿连中三元以3比0大胜年青人，早前喺国际赛受伤嘅戴巴拿上场联赛已经复出，今场有望正选拍住C朗喺前线搵食。

「斑马兵团」食住英超兵

「斑马兵团」祖记上场联赛虽被热拿亚逼和1比1，开季10连胜断缆，不过论整体表现，祖记今季仍然比「红魔」稳定得多。祖记对上一次喺欧联输畀英超球队，已经要追溯到2008/09年16强作客输畀车路士0比1，之后7战4胜3和，当中近5次仲赢左4次，包括上届16强作客击败热刺、与及2015/16分组赛作客赢曼城，出战英超球队完全未惊过。

曼联上周末作客打和车路士2比2，可以讲系今季表现最好嘅其中一场比赛，不过睇番比赛过程，「红魔」上半场基本上捱打，加上佢的今季联赛连盃赛6场主场只赢2场，而且对手实力唔算强，今次对住近4届两度杀入欧联决赛嘅祖记，相信唔易应付，祖记让平半，一于捧上盘。