防線穿窿＋搶分喪攻 紅鑽三箭做大龍鳳
文:工廠仔

日職今日連場大戰，浦和紅鑽主場迎戰廣島三箭。浦和紅鑽聯賽3連敗，今日主場迎戰褪色勁旅三箭本來係反彈好時機，但考慮到紅鑽近期防線嚴重不穩，日皇盃對住丙組嘅盛岡仙鶴都只能夠險勝3比2，今仗惟有再加強進攻火力，既然紅鑽今季7仗聯賽主場有6次總入球達3球或以上，今仗轉捧中位數3球、3球半嘅大盤方為上算。
（有線61及201台周六下午6時直播）

浦和紅鑽自從喺亞冠盃16強淘汰濟洲聯出局，回歸聯賽表現不升反跌，上仗作客1比2輸畀鳥棲砂岩，聯賽遭逢3連敗，依家聯賽只係排喺第9位，落後榜首柏雷素爾成12分咁多，爭奪冠軍機會愈嚟愈渺茫，難得今仗對手只係排尾2嘅廣島三箭，加埋隊波依家冇傷病，正好係紅鑽重響勝鼓嘅最好時機。

丙組仔都入紅鑽兩粒
紅鑽今季15仗聯賽轟入36球，係目前日職入波最多嘅球隊，進攻火力毋庸置疑，不過紅鑽今季最大問題係防線穿窿，紅鑽今季7仗聯賽主場只有1仗保持清白身，近4仗聯賽主場更合共狂失10球，而且上周中紅鑽喺日皇盃面對日丙盛岡仙鶴都醜態百出，幾經艱辛先贏3比2晉級，以三箭班底，不難在紅鑽身上取得入球。

事實上廣島三箭近況同樣好唔掂，16場聯賽後防失咗26球，上仗護級大戰0比3輸畀大宮松鼠，依家排聯賽榜尾2深陷降班漩渦，為免繼續沉淪，佢哋向飛腳收購咗守衞丹羽大輝同巴西前鋒柏德列奧利華拉，作客勢頹嘅紅鑽一樣會搶攻求3分，今仗好大機會同紅鑽搏槌鬥攻，大盤好路。