火燄受讓反噬伐木者
文:Mic少

明早美職壓軸戰，波特蘭伐木者主場對芝加哥火燄；火燄今季簽入德國名將舒韋恩史迪加等猛將之後實力大「升呢」，近10場聯賽更獲得8勝2和，高踞東西岸總排名榜首。反觀伐木者連盃賽在內，已經連續5場不勝，今場仲要讓波，梗係捧芝加哥火燄1.72倍讓球客勝啦！

（TVB 303周四早上10時30分直播）
小豬缺陣都夠殺
芝加哥火燄係上季總成績最差球隊，今季搖身一變成為「一哥」，皆因球隊進行大換血，包括簽入兩位高質外援尼曼查尼高歷及舒韋恩史迪加。其中以匈牙利前鋒尼曼查尼高歷表現最搶鏡，至今已經轟入16球，包括上仗梅開二度，大炒溫哥華白帽4比0。至於以「小豬」舒韋恩史迪加嘅級數，踢美職亦表現大超班，可惜佢上場傷出，今場上陣成疑，慶幸火燄已經踢出信心，就算「小豬」今場缺陣，亦有力全身而退。

另一邊廂，波特蘭伐木者頹勢未止，繼美聯盃不敵西雅圖海灣者之後，近4場聯賽亦只有2和2負。伐木者今場要讓波，好大程度因為佢哋近4次聯賽主場對芝加哥火燄，取得3勝1和佳績。不過，上述對賽成績已屬過去式，以伐木者近期弱勢，恐怕今場惡唔出樣。