紅鑽客戰腳仔軟 川崎主勝冇甩拖
文:工廠仔

日職今日上演兩場重量級補賽，由4支今季有份出戰亞冠盃嘅球隊捉對廝殺，其中聯賽榜排第6嘅川崎前鋒主場迎戰浦和紅鑽。前鋒上仗主場5比0大炒神戶勝利船，主場累積6連勝兼轟入19球，相反紅鑽近6場作客輸5仗，防守形同虛設，今仗面對前鋒好惡頂，2.7倍主勝值得捧場。

（有線64及203台周三晚6時直播）
川崎前鋒季初分心亞冠盃，聯賽排名一度跌出前8位，幸好經過適當調整，踏入5月份無論聯賽或亞冠盃成績皆節節上升，除咗成功進身亞冠盃8強，依家喺聯賽榜亦追至落後榜首櫻花6分，保持爭標機會，士氣及信心完全恢復。前鋒上仗聯賽主場5比0大勝神戶勝利船，聯賽連盃賽主場已連贏6仗，今仗續在主場布陣定必乘勝追擊。

紅鑽防線極不穩
浦和紅鑽走勢同前鋒啱啱相反，雖然季初一度排喺聯賽榜首，但近7場聯賽卻只得2勝1和4負，其中上仗聯賽主場鬥廣島三箭，紅鑽喺領先2比0優勢下，竟然一度連失3球，即使最後關頭連入2粒驚險反勝4比3，但防線嚴重不穩嘅問題已經暴露，縱有強大鋒力，亦不足彌補後防之失。況且紅鑽聯賽連盃賽近6場作客輸5仗，同主場穩定嘅前鋒相比高下立見，今場川崎前鋒主勝乃信心之選。