鹿島鹿角撞散FC東京
文:Mic少

日職作客王力保1哥位
日職踢埋今輪，就會休戰3星期，目前爭標形勢非常緊湊，榜首鹿島鹿角僅領先次席大阪櫻花1分，比第3位嘅柏雷素爾亦只多兩分，絕對冇失分空間。今晚鹿島鹿角作客ＦＣ東京，鹿角挾今季8場聯賽作客全勝勇勢，誓搶贏波3分保「1哥」位，一於再追鹿島鹿角2.02倍客勝！

（有線61及201台周六晚6時直播）
鹿島鹿角今季好奇特，作客成績遠勝主場，繼上周日作客反勝當時榜首嘅柏雷素爾3比2後，周中補賽作客又贏大阪飛腳1比0，成為日職唯一作客全勝球隊，唔到你唔服。更何況今仗對手ＦＣ東京陷入低潮，近3場聯賽輸晒，而且近7場聯賽只曾擊敗下游分子清水心跳，當中對住排名前列嘅柏雷素爾、橫濱水手及大阪櫻花皆全失3分，今場遇上「作客王」鹿角，又有大久保嘉人、森重真人兩大主將養傷，東京縱有主場之利亦凶多吉少。

前列大戰 柏雷素爾頂得住櫻花
同日另1場前列大戰，由「2哥」大阪櫻花主場對排第３嘅柏雷素爾。包括聯賽及盃賽，大阪櫻花近11仗獲得10勝1和，但要留意櫻花對上1次輸波，對手正係柏雷素爾，而且柏雷素爾近6場聯賽作客5勝1和，相信頂得住大阪櫻花攻勢，柏雷素爾受讓堅筍，可博1.66倍讓球客勝。
（有線64及203台周六晚6時直播）