墨西哥主帥停賽捱細界
文:Mic少

領隊奧蘇里奧停賽，墨西哥要靠36歲門神哥朗拿指揮。
美國舉行嘅美洲金盃，明早上演C組賽事，上屆冠軍墨西哥對薩爾瓦多。早前為墨西哥出戰洲際盃嘅查維亞靴南迪斯、卡路士韋拿等星級主力都獲准放假，並冇入選，領隊奧蘇里奧以墨超球會土炮陣容出擊，實力打折扣。最大鑊係奧蘇里奧被罰停賽6場，今屆都唔可以喺後備席親自指揮球隊作戰，難炒薩爾瓦多，寧願揀中位數2.5球嘅入球細。

（周一早上9時開賽、馬會網上文字直播）
墨西哥近4屆美洲金盃3次奪冠，但近2屆表現慢熱，上屆分組賽3戰僅1勝2和，更何況今屆以「B隊」參賽，人腳實力唔及早前踢洲際盃嘅「正規軍」。領隊奧蘇里奧更因為喺洲際盃季軍戰侮辱球證，被國際足協重罰停賽6場，換言之，就算墨西哥入到決賽，佢都唔可以喺場邊親自領軍。墨西哥本身陣容「拉雜成軍」，仲要冇埋主帥指揮比賽，隨時亂晒陣腳，不宜高估。

薩爾瓦多破蛋乏力
至於薩爾瓦多近年水準走下坡，早前更喺世盃外第4圈A組包尾出局，完全冇料到。加上薩爾瓦多近6次對墨西哥，全敗收場，今場要爆冷固然難過登天，就算入波機會亦好微。幸好墨西哥今屆人腳麻麻，薩爾瓦多應該小負居多。