日職一哥弗到爆 櫻花追殺天鵝
文:法達斯維

今晚日本天皇盃第3圈上演日職「首尾」對決，由新潟天鵝於主場迎戰聯賽「1哥」大阪櫻花。天鵝依家喺聯賽排緊包尾，護級形勢水深火熱，邊有咁多餘力去兼顧盃賽呀，面對弗到漏油嘅櫻花難逃厄運，1.68倍客勝不容錯過。

（周三晚6時開賽）
查實計埋今仗在內，兩軍喺今季聯賽連盃賽已第3度碰頭，之前2次櫻花都贏波，包括喺聯賽首循環大勝4比0，足證雙方實力差天共地。今季重返日職嘅櫻花狀態大勇，上仗聯賽以2比1擊敗柏雷素爾，聯賽連盃賽近5仗全勝共入13球，唔單只力壓鹿島鹿角升上聯賽榜首，而且櫻花近2仗皆在半場落後1球嘅劣勢下，成功反勝對手，可見韌力十足，依家士氣、信心達到高峰。

相反，天鵝今季演出慘不忍睹，聯賽踢咗18仗攞得8分咁大把，係唯一得個位數字積分嘅球隊，難怪做緊包尾大幡喇，降班危機日深，下半季需要將全副心機放晒喺護級。

天鵝護級盃賽hea踢
天鵝喺盃賽表現亦麻麻，先喺日聯盃分組賽包尾出局，喺上圈日皇盃迎戰低組別球隊加古川山賊，亦要踢至加時先險勝2比1，加上天鵝近5仗主場法定時間僅得1和4負，為免兩線作戰影響護級，今仗隨時「壯士斷臂」唔去盡，一於捧櫻花客勝。