些路迪超班惡到曉菲
文:Mic少

歐聯第2圈外圍賽首回合最後一仗今晚上演，蘇超班霸些路迪會作客北愛爾蘭盟主連菲特，雖然兩隊都係嚟自英國嘅冠軍級球隊，但級數上仍然有明顯差距；些路迪上仗熱身賽搵愛爾蘭勁旅沙姆洛克流浪拍跳就大派9隻光蛋，今仗讓球主客和讓兩球只係小兒科，2.05倍讓球客勝咪走寶。

（周六凌晨零時開賽）
些路迪上季搵羅渣士執教後，實力同穩定性都增強唔少，法國新星穆沙迪比利更成為歐洲豪門搶手貨，球隊上星期同愛爾蘭嘅歐霸盃代表沙姆洛克流浪踢熱身賽，竟然以9比0狂勝，沙姆洛克流浪主帥巴特利賽後更預言：「連菲特冇機會阻止些路迪晉級。」喺呢場熱身賽傷出嘅隊長史葛布朗，亦證實無大礙可以上陣，自然更加穩陣。

連菲特受讓兩球照反
連菲特由北愛名將大衞希利領軍，喺國內聯賽就蝦蝦霸霸，但出到歐洲只係三線水準，首圈對住嚟自魚腩聖馬力諾嘅拉科奧里塔，兩回合計只係小勝1比0。上星期連菲特專登搵另一蘇超球隊赫斯考驗實力，結果就以1比4慘敗，今仗對住實力更勝赫斯嘅些路迪，大敗似乎無可避免。