換帥增兵辛尼特頭炮易響

俄超周日下晝4點就有波睇，由爭標勁旅辛尼特作客新升班嘅卡巴羅斯克。上季只得聯賽第3位嘅辛尼特，今夏聘請意大利名帥文仙尼執教，而且重金羅致2位阿根廷猛將，目標擺明直指聯賽冠軍寶座，第一擊面對弱旅卡巴羅斯克不勝無歸，客勝值博。

（周日下午4時開賽）
級數遠勝卡巴羅斯克
辛尼特喺6月聘用前曼城、國際米蘭主帥文仙尼領軍，不過球隊未有作出大換血，反而係重點增兵，包括用2,300萬歐元高價向羅馬買入阿根廷中場里安度柏利迪斯，以及2,000萬歐元簽入河床新星前鋒迪奧斯，現年21歲嘅迪奧斯上季喺阿甲攻入17球，絕對係可靠嘅數胡人物，相信球隊整體戰鬥力會大大提升。

除咗引入新球員外，新任隊長基斯薛圖亦大讚文仙尼對球隊進行嘅戰術改革，加上隊波本身擁有查維加西亞、高哥連、伊雲洛域等星級猛將，絕對係卡士十足。其實辛尼特季前備戰一直做得好充足，近7季聯賽首戰獲6勝1和，今仗對級數差幾班的卡巴羅斯克，有力輕鬆打響頭炮。