克雷塔羅擅踢守細波
文:渡邊年

墨西哥超級盃聽朝爆發，由克雷塔羅對CF阿美利加，今仗喺美國加州嘅中立場舉行。克雷塔羅只屬墨超下游球隊，能夠爆冷拎到首階段墨西哥盃冠軍，全靠「泊大巴」死守戰術，加上近4次對CF阿美利加，總入球皆喺2球或以下，今仗向入球細埋手最明智。

（周一清晨5時36分開賽）
墨西哥超級盃由上季首、次階段墨盃盟主爭逐，因為瓜達拉哈拉囊括墨超次階段季後賽冠軍同墨盃錦標，需出戰墨西哥冠軍盃，所以由近年墨盃成績彪炳嘅CF阿美利加特別頂上，火併首階段墨盃盟主克雷塔羅。論近年聯賽成績，克雷塔羅唔及CF阿美利加，但踢盃賽就係另一回事。因為克雷塔羅防守出色，佢哋喺首階段墨盃4強同決賽，法定時間內都同對手打和0比0，然後憑互射12碼勝出。雖然踢法消極，但效果理想，今仗應會繼續沿用。

4鬥CF阿美利加全細盤
CF阿美利加近4次對克雷塔羅，只係拎到1勝1和2負成績，完全唔見得有任何優勢，而且4次交鋒總入球都係2球或以下，其中3仗更加係1球定勝負，可見雙方對壘，往往陷入拉鋸局面。加上今仗一戰定生死，兩隊都會比較謹慎，入球唔慌多，捧入球細最划算。