墨西哥3叉戟爆庫攞彩
文:法達斯維

上輪喪攻食白果冇face
喺美國舉行嘅美洲金盃，聽朝上演C組尾輪賽事，其中弱旅庫拉索要硬撼衞冕嘅墨西哥。墨西哥上仗狂攻之下被牙買加悶和，冇晒飛士，主帥奧蘇里奧落柯打今仗繼續3箭齊發，撞正庫拉索有主力守將積高巴上陣成疑，隨時成為「仙人掌國」嘅出氣袋，就算讓2球照捧讓球客勝。

（周日早上8時30分開賽、馬會網上文字直播）
衞冕嘅墨西哥一向都係中北美洲老大哥，總共攞過7次美洲金盃，包括近4屆贏咗3屆，連美國都要行埋一邊。不過，墨軍上月要出戰洲際國家盃，因此兵分兩路，「小豌豆」查維亞靴南迪斯等主力就打洲際盃，而美洲金盃則起用2線兵，首仗輕取薩爾瓦多3比1後，上仗採用3叉戟奧拜連派尼達、艾歷托利斯及艾利斯靴南迪斯狂攻牙買加，竟然被悶和0比0。

雖然墨西哥仍累積4分排第1，對出線冇大影響，但貴為奪標大熱，咁樣失分真係冇晒face，搞到主帥奧蘇里奧備受壓力，佢講明今仗續派3叉戟殺敵之餘，仲會加埋進攻中場馬田巴拉根做支援，擺出喪攻陣都咪話唔得人驚。

庫拉索主力守將受傷
另邊廂，庫拉索頭2場輸晒兼冇波入，今仗要贏波先有機會出線，不過主力積高巴上仗傷出，今仗好大機會缺陣，冇埋呢位守將兼要焗攻，盞死多兩錢重，墨西哥就算讓2球都冇有怕，直取讓球客勝。

薩爾瓦多牙買加對攻
早少少開波嘅同組賽事，牙買加火併薩爾瓦多，依家牙買加有4分排緊第2，領先薩爾瓦多1分，查實牙軍出線在望，冇晒心理包袱之下，主帥韋摩亞揚言今仗唔會保守，咁啱薩爾瓦多想晉級最好係攞多1分，亦唔會坐以待斃，鬥攻格局捧入球大更佳。
（周一早上6時開賽）