女子歐國盃今晚開騷
文:Mic少
今個暑假國際大賽浪接浪，大家睇完洲際國家盃、世青盃、U21歐國盃同依家進行緊嘅美洲金盃後，今晚輪到女子歐國盃喺荷蘭開打！16支女子國家隊先分4組，角逐8強席位後再捉對廝殺，決定冠軍誰屬。所謂巾幗不讓鬚眉，今晚首演兩場A組賽事，勢必掀起惡鬥！
荷蘭謹慎 挪威慢熱 玩細不攻
女子歐國盃周一凌晨拉開戰幔，揭幕戰由東道主荷蘭女足喺A組迎戰挪威女足。挪威女足係德國女足以外，歷來女子歐國盃成績最好嘅球隊，不過挪威女足向來喺分組賽表現慢熱，入球同失球數字都偏低。翻查紀錄，挪威女足對上3屆9仗分組賽有7次總入球係2球或以下，荷蘭女足上屆分組賽曾以0比1不敵挪威女足，今次有主場之利亦唔敢輕舉妄動，捧入球細最穩陣。
（有線61、64、201、203台及奇妙電視第77台周一凌晨零時直播）
自從女子歐國盃喺1997年開始改由8支球隊角逐以嚟，挪威女足近5屆賽事有4屆能夠進身4強、2次入決賽，雖然未能一嘗冠軍滋味，但連同改制前賽事，挪威女足歷來贏過2次女子歐國盃冠軍、4次亞軍，成績僅次於6連霸盟主德國女足，稱得上係傳統勁旅。
揭幕戰以穩為先
不過挪威女足對上3屆9仗分組賽，只有1次試過單場攻入2球或以上，鋒力唔算銳利，好在挪威女足擁有一條堅固防線，上屆3仗分組賽只失1球，包括同以1比0擊敗今仗對手荷蘭女足同德國女足，今屆料會繼續以穩守戰術與列強周旋。
荷蘭女足曾經喺2009年殺入女子歐國盃4強，上屆分組賽遇上兩大勁旅德國女足同挪威女足，結果3戰僅得1分包尾出局，今屆以東道主身份參賽，戰意毋庸置疑，不過荷蘭女足今屆毋須應付外圍賽，上屆3仗分組賽都冇入過波，為免重蹈覆轍，今仗料會更加小心，捧細盤最明智。
丹麥平庸 比利時升呢 讓客至上
女子歐國盃A組另一仗，由丹麥女足火併比利時女足。丹麥女足雖然係上屆4強分子，不過其實球隊上屆5仗比賽法定時間內從未贏過波，表現未見突出，何況丹麥女足同比利時女足喺今屆外圍賽同以6支最佳小組次名身份出線，實力可謂半斤八両，「讓球主客和」丹麥女足讓一球難有把握，比利時女足讓客值博。
（周一凌晨2時45分開賽）
丹麥女足近年國際賽表現並唔突出，2011年同2015年皆未能進身世盃決賽周，對上3屆女子歐國盃更有2次喺分組賽出局，上屆雖然以冷門姿態打入4強，但球隊喺分組賽3戰不勝只得2分，僅靠抽籤壓過俄羅斯女足進身8強，去到8強亦要踢足120分鐘，最後憑互射12碼淘汰法國女足，晉級過程略帶幸運成分。
兩度交手各勝1次
比利時女足過往國際大賽成績一片空白，今次係該隊首次進身大賽決賽周，表現進步唔少。比利時女足今屆外圍賽同傳統勁旅之一嘅英格蘭女足同組，曾經以1比1作客逼和英軍，實力不容小覷。翻查往績，丹麥女足同比利時女足上年曾經2次交手，最終各得1勝，今次再度碰頭，比利時女足獲得受讓之利，不妨追捧讓球客勝。
