孙兴民复出反攻阿积士
周四凌晨欧联4强次回合，热刺作客同阿积士争夺最后1个决赛席位。首回合主场输0比1嘅热刺，想晋级非胜不可，南韩射手孙兴民首回合停赛后强势复出，誓要带领球队绝地反击，况且阿积士喺今届淘汰赛阶段明显「客强主弱」，难有本钱让波，捧1.72倍让球客胜。
（MyTV Gold303、Now 643、有线616及656台周四凌晨3时直播）
荷兰班霸客强主弱
先后淘汰皇家马德里同祖云达斯两支欧联传统劲旅嘅阿积士，早前踢4强首回合，再靠云迪碧克一箭定江山赢波，延续惊喜表现，今场返回主场再斗热刺，阿积士只要唔输波，就可继1996年后再入决赛。
阿积士青训系统向来喺欧洲数一数二，今届呢支荷甲代表能够喺欧联一路高歌勐进，法兰基迪庄同马菲斯迪历特等青训出身嘅骨干球员，绝对功不可没，呢班球员由细到大都被灌输「进攻就是最佳防守」嘅战术理念，相信就算攞住1球优势，次回合都未必会死守。不过阿积士近3次欧联主场仅取2和1负，主场表现反而一般，早前16强同8强淘汰皇家马德里及祖云达斯，都要靠次回合喺客场奠定胜局，今次面对热刺要先主后客，大赛经验欠奉嘅阿积士小将们随时会不知所措。
值得留意，首回合阿积士能够赢波，同赛前得到荷甲赛会迁就，唔使踢联赛，球员体能储备充足有一定关係；但嚟到次回合就冇呢支歌仔唱，阿积士啱啱踢完荷兰盃决赛，对备战今场次回合生死战肯定有影响。
传哈利仔有望上阵
热刺首回合开局冇耐失守，明显未适应阿积士嘅技术型踢法，好彩球队及时畀领队普捷天奴点醒，下半场即刻攞番主动权，可惜碍于前场兵源短缺问题，未能成功破蛋，亦凸显孙兴民嘅重要性。好彩今场「老孙」坐完波监复出，呢位南韩射手走位飘忽，擅于捕捉靓位入楔，近4场欧联上阵入4球，脚风奇顺。翻查往绩，热刺近10仗欧联作客都入到波，加上有传王牌前锋哈利卡尼有机会提早复出，热刺今场想翻盘绝非冇可能，让球客胜係不二之选。