晏菲路主场劲爆
欧联4强次回合，利物浦周三凌晨主场再斗巴塞隆拿。巴塞首回合虽大胜3比0，不过佢哋对上两届淘汰赛作客都曾出现崩溃式大败，晋级未十拿九稳；红军喺高普带领下于晏菲路出战欧洲赛未输过，虽然王牌穆罕默德沙拿因伤缺阵，但相信至少可以喺主场赢番场，今场开平手盘，捧利物浦坐和望赢。
（myTV Gold 303、Now 643、有线616及656台周三凌晨3时直播）
巴塞欧联客战曳有前科
巴塞首回合虽然大胜3比0，不过比数唔足以反映场上战况，事关巴塞领先1比0后，利物浦有唔少机会可以扳平，如果唔係美斯个人能力太屈机，巴塞未必拎到3球领先优势。巴塞今场只要唔输多过2球就可跻身决赛，不过大家唔好忘记，佢哋上届8强对罗马，同样喺首回合领先4比1下，次回合作客淨吞3蛋出局；再前一届巴塞先后喺16强作客以0比4输畀巴黎圣日耳门、8强再以0比3不敌祖云达斯，最终8强止步，所以未到球证吹完场，真係唔敢讲巴塞「级已晋」。
利物浦喺欧联上演嘅奇迹唔使多讲，05年决赛对AC米兰，红军只用半场时间由落后0比3追至3比3，最后赢埋12码捧盃。今晚有足90分钟畀佢哋追，绝对唔係不可能任务。仲有一点要留意，利物浦对上8次欧联淘汰赛喺主场踢次回合，有7次能够成功晋级，心理上都有帮助。
自从高普喺2015年10月出任主帅后，利物浦嘅欧洲赛主场从未输过，18场攞到14胜4和，单计近两届欧联，利物浦12场欧联主场有8场保持冇失波，合共轰入34球，攻守兼备，加上佢哋今季总计所有赛事主场亦仅输1场，近18场录得16胜2和，主场气势唔嘢少，就算缺少沙拿，红军平手盘都玩得过。