今晚压轴戏云达不来梅主场对多蒙特，主队排第9位，想踢下届欧洲赛事必须要赢晒馀下3仗至有价讲，客军落后榜首拜仁两分，想争冠同样要力争全胜，若然和波等于两败俱伤。况且双方啱啱至经历完耻辱性惨败，今场矢志踢争气波，预期係对攻格局，推介有2.29倍嘅中位数3.5球大盘。
（on.cc东网周日凌晨零时30分直播）
不来梅上轮作客以1比4惨败于杜塞尔多夫脚下，但睇表现其实唔太差，只係对手反击交出超水准，4个入波都靓到绝，输完呢场不来梅已经落后第7位嘅贺芬咸4分，争欧霸形势被动，但先决条件係自己赢晒未来3场先，其实佢哋近期前线火力唔曳，荷兰中场卡拉臣频频有士哥，今晚主场出击预计会开波就抢攻，不过主力中坚摩辛达停赛，防线不整下预期好难唔失波。
柏高艾卡沙担正挂帅
多蒙特想保持冲冠希望亦只有赢波一途，今仗仲要阵容不整，守将阿舒拉夫同萨加度养伤、右闸马里奥斯禾夫同中场大佬马高列奥斯停赛，防线严重缺人，只能寄望刚伤愈嘅比薛斯基可以及时操起状态顶档，但前场佢哋人才众多，今仗马里奥葛斯将会移后顶替马高列奥斯，高效射手柏高艾卡沙得以担正，将转投车路士嘅美国神童基斯甸佩列锡亦重获正选，实行上足弹药同不来梅驳火！