5连胜弗到爆
周六日职重头戏──北海道札幌冈萨多主场斗神户胜利船，暴发户胜利船易帅后依旧低迷，主将普多斯基唔只辞职拒任队长，恩尼斯达亦有伤，诸事不顺，佢哋想喺「令和年代第一击」反弹冇咁易，札幌值得睇好。
（有线603及604周六下午1时直播）
胜利船早前虽有西班牙教头尼路请辞，但成队波表现依然未见起色，上场联赛主场以1比2不敌衞冕冠军川崎前锋，联赛累积4连败，现仅排联赛榜第12位，状态陷入谷底。
胜利船内乱4连败
最大问题係，胜利船内部潜藏暗涌，放低队长臂章嘅普多斯基，上场波宣称负伤唔踢，仲自行喺Twitter发布消息，令球会以至联赛会非常不满，被罚停操3日反省，然后再公开谢罪。而且新任队长「小白」恩尼斯达肌肉又有伤，两日前冇练休息，初濑亮又要抖成个月，一单好消息都冇，连日本传媒觉得佢哋今场极之恶踢。
札幌季前虽有上季首席射手都仓贤离队，不过新加盟嘅巴西外援安达臣卢比斯，同埋土炮射手铃木武藏皆有上佳演出，2人今季喺联赛合共轰入10球，加上总计联赛及盃赛，呢班波已经连赢5场，士气、信心此消彼长。虽然「跳楼专家」安达臣卢比斯都有些少伤，但係佢哋平均每场进攻创造机会率达13.2%，居日职第1位，每场跑动距离超过117公里，又位列日职第3，主场出击根本无惧胜利船，让主[-1]值得睇好。