周四凌晨欧联4强首回合重头戏，巴塞隆拿主场迎战利物浦。「地上最强」上场联赛半力出击赢波提早封王，相反「红军」喺英超跟曼城争冠斗得难分难解，冇得轮换下体力较输蚀；巴塞对上31场欧联主场豪取28胜3和，有力先拔头筹开主Ｗ。
（myTV Gold 303、Now 643、有线616及656台周四凌晨3时直播）
巴塞上场以1比0击败利云特后，提早3轮宣布成功衞冕西甲，摒除月底举行嘅西盃决赛，现阶段可专心应付欧联比赛，争取成为三冠王。教练华尔维迪吸取上季较少轮换、最终喺欧联8强被罗马淘汰嘅教训，今季明显更懂得留放，好似美斯、布斯基斯上场联赛只係打后备；美斯今届喺欧联已累积10球，现喺射手榜领先，加上佢之前32次斗英超球队个人轰入24球，係欧联史上攻入英超球队大门最多次数嘅球员，今次养精蓄锐定必全力争取士哥，务求为巴塞打响头炮。
利物浦伤疲作客难顶
利物浦喺各项比赛已经连赢10场，气势非同小可，但相比之下，佢哋为争球会史上首个英超冠军，联赛场场都要搏，无论体能上或心态上都比巴塞输蚀。前锋罗拔图法明奴上场联赛因伤避战，虽然今场有望复出，但隐约已睇到球队伤疲问题。再者，红军今届欧联作客表现绝非突出，5场只得2胜3负，包括分组赛输畀弱旅贝尔格莱德红星，要喺鲁营全身而退唔容易。
巴塞对上一次欧联主场输波已经係12/13球季，当时佢哋喺4强次回合淨吞拜仁慕尼黑3蛋，总比数输0比7被淘汰，之后巴塞31场欧联主场录得28胜3和，赢波率不但高达9成，而且已创下咗欧联主场最长不败纪录，巴塞只要入多1球，便可达到欧联500球嘅里程碑，首回合主场出击绝对可睇高一线，主Ｗ值得支持。