卡尼孙兴民伤停热刺湿滞
欧联4强首回合开战，周三凌晨热刺先于主场斗阿积士。阿积士今季之所以一路高歌勐进，同超强作客表现有好大关係，加上早前新主场不败金身已破嘅热刺，两位主力前锋哈利卡尼同孙兴民分别因伤停问题缺阵，今仗让唔起对手，阿积士让球客胜係不二之选。
（myTV Gold 303、Now 643、有线616及656台周三凌晨3时直播）
作客连劏皇马祖记
今届欧联4强戏码绝对够新鲜，相信大部分球迷，季前都估唔到热刺同阿积士会喺4强碰头，而其中最令大家惊喜肯定非阿积士莫属；呢支喺名宿告鲁夫带领下，曾经喺上世纪70年代初称霸欧洲球坛嘅荷甲传统劲旅，今季绝对係背负荷兰足球荣辱出战欧联，为咗配合阿积士备战，荷甲联赛赛会决定上轮全部赛事延期，畀一班阿积士球员抖到足喺欧联应战。
得到荷甲场外发功支持嘅阿积士，今季以中场法兰基迪庄同后衞马菲斯迪历特两位青训产品为核心，踢出精彩传控足球，就算作客都有力主导比赛局势，今届欧联8场作客取得4胜4和，包括早前先后作客击败皇家马德里同祖云达斯两支世界顶尖劲旅，今场作客伦敦，有望再次反客为主。
新主场吞首败洩气
热刺能够杀入欧联4强，表现及能力同样值得肯定，不过今场首回合，呢支伦敦球队有多位主力缺阵，除咗头号球星哈利卡尼因伤倦勤之外，近期状态弗爆嘅南韩前锋孙兴民因为累积黄牌关係，今场要坐波监，冇咗两位神锋压阵，热刺攻力肯定大打折扣，加上中场主力穆沙施素高有伤上阵成疑，阵容天残地缺嘅热刺形势不容乐观。况且热刺啱啱吞下喺新主场嘅首场败仗，士气大受打击，今场能否反弹并不乐观，让波相当择使，捧阿积士让球客胜好过。