今晚戏码係杜塞尔多夫主场对云达不来梅，今场我哋安排咗英语旁述，杜塞尔多夫近期喺冇晒压力下大踢开放足球，而云达不来梅想争下届欧霸入场券今场非胜不可，今仗预期又係一场入球骚，黑柴胆粗粗，推介有2.5倍嘅中位数3.5球大盘。
（on.cc东网周六晚9时30分直播）
杜塞尔多夫平均总入球3.6个
杜塞尔多夫係今届德甲神奇球队，目前排喺联赛第10位已经係喜出望外成绩，佢哋晨早护级成功后，仲大踢开放式进攻足球，成班波既有成绩又好睇，自然博得球迷喜爱，睇番佢哋踏入2019年踢咗13场德甲赛事，全场总入球达到47个，平均每场炮製咗3.6个入球，而且係主场佢哋更加有前冇后，今季15场德甲主场7胜8负，永冇话同对手握手言和，仲经常不计胜负，去到比赛末段都空群抢攻，前线比利时孖宝卢克巴基奥同宾尼图拉文已经踢出名堂，事实上佢哋今季剩低4轮联赛，不论胜负都已经注定得到一个成功球季，嚟到呢个阶段根本冇理由保守，势必继续踢进攻足球，同球迷一齐爽到底。
不来梅丧攻抢欧霸入场券
云达不来梅表现同成绩同样令人满意，尤其过去一星期佢哋喺德甲同德国盃两斗班霸拜仁慕尼黑都只係仅负，仲输得有啲唔抵，输咗比赛但已经赢尽掌声。佢哋目前排第8位，但只落后第6位嘅贺芬咸4分，仲有机会争夺下届欧霸盃入场券，不过由于未来剩低嘅3轮联赛要分别硬撼质态均佳嘅多蒙特、贺芬咸同RB来比锡，今晚遇上杜塞尔多夫已经係佢哋剩低落嚟最容易应付嘅对手，对呢3分绝对係志在必得，事实上佢哋前线状态亦火热，由老大哥麦斯古斯带领住新星拉斯卡同艾格史甸兄弟嘅攻击线，组织同入球能力都令人雀跃，今仗对住经常不设防嘅杜塞尔多夫，入波当然唔会少。