意大利盃4强生死战
意大利盃4强次回合杀到埋身，on.cc东网将会一连两晚免费直播畀大家，今晚先有AC米兰返主场硬撼拉素。首回合互交白卷，不过AC係正宗主场龙，喺自己地头出击有保证，反而拉素箭头恩莫比尼近期熄晒火，今场开平手盘，「红黑兵团」坐和望赢。
（on.cc东网周四凌晨2时45分直播）
首回合闷和0比0，查实双方近况都麻麻，AC近6仗只得1胜，拉素则近5仗仅1捷，真係半斤八両，但要留意，AC之前2仗取得1胜1和，而嗰场胜仗就係主场赢拉素1粒，可见佢哋开始重上正轨，之前受伤嘅门神基安卢基当拿隆马同后衞沙柏达华伦西亚已经好番，并喺上仗联赛复出，有助巩固防线，而畀人批评近期冇料到嘅中场苏索，上仗亦交出助攻，配合「新罗拔利云度夫斯基」嘅比亚迪克，攻力唔曳。AC今季主场出色，17场主场联赛取得10胜4和3负，係主场成绩第3好球队，上圈意盃亦喺主场赢拿玻里，喺自己地头出击特醒。
拉素恩莫比尼死晒火
相反，拉素一向靠神箭恩莫比尼数胡，但呢位意大利国脚状态低沉，近6仗入得1粒咁大把，脚风唔顺，日前联赛更衰到输畀包尾兼笃定降班嘅基尔禾，仲有路尔斯阿拔图同米连高域沙域做埋「红牌阿姑」，睇得出成班波踢到好躁，咁样输波都几打击士气。翻查纪录，双方近6次正面交锋，AC取得2胜4和未输过，明显剋住拉素，今仗主场出击唔使让波咁笋，平手盘必捧「红黑兵团」。