复活节假期，又係星期六晚，今晚德甲加开深夜场，史浩克04主场迎战贺芬咸，史浩克要抢分护级，不过贺芬咸係德甲其中一支状态最火热球队，正全力争夺下届欧洲赛入场券，计实力同状态亦远胜衰落中嘅史浩克，贺芬咸让半一照捧上盘。
（Now 672、有线653及613台周日凌晨2时30分直播）
年仅31岁嘅拿高斯文唔只喺德甲炙手可热，佢过去两三季带领贺芬咸嘅表现，甚至赢得全欧洲尊重，连名帅哥迪奥拿都话要喺佢身上学习，而德甲「小富豪」RB莱比锡更有先见之明，晨早预订咗佢下季过档领军，不过拿高斯文对贺芬咸始终有深厚感情，自上月初起，已多次声明要为球会争夺下届欧洲赛入场券，而球队亦以火热状态同入球能力兑现承诺，目前联赛榜排名已经由第9位升上第6，拿高斯文今仗赛前更调整目标，话要喺馀下5轮联赛全胜攞晒15分，除确保下季有得踢欧霸外，仲希望能奇迹后上抢得欧联入场券。
史浩克近期有老帅史堤芬斯出山救亡，但球员质素明显今不如昔，上轮护级战对纽伦堡形势上根本唔够揪，全靠门将纽布屡救险球至唔使输，遇大勇嘅贺芬咸难有运行。