两军近期前线都交足货，而且联赛冇晒压力可以大踢风流波，预期会继续有前冇后踢法，为大家献上精彩入球骚，大盘係稳阵之选。
（on.cc东网周六晚9时30分直播）
双方目前分列联赛榜第12同第10位，既冇降班威胁，亦冇争踢下届欧洲赛野心，而事实上以两会投资同规模，攞到目前成绩已经超额完成，所以双方大营都充满欢乐气氛。
桑马迪达火併卢克巴基奥
缅恩斯经过早前抢够分Hea咗一轮后，前仗主场突然发威，以5比0大炒坚硬淨嘅弗赖堡，快速行军加上超强把握力震惊德甲，箭头桑马迪达仲连中三元大爆发，跟住上轮作客多蒙特喺半场落后两球下力追，全场射门比「蜜蜂兵团」更多，下半场拉近比数后，到尾段仲差啲扳平，若非多蒙特门将路文贝基补时阶段喺白界前连环3次神救，缅恩斯已经喺西法伦球场抢到分，今晚返到强项主场强阵出击，当然会趁勇继续抢攻。
杜塞尔多夫係公认今季德甲最神奇球队，上轮对班霸拜仁初段表现慢热失咗先机，但后段发力还击都唔讲得笑，比利时锋将卢克巴基奥再喺拜仁身上入到波，今晚对手级数转弱，老帅芬基决定放手一搏，将卢克巴基奥同宾尼图拉文呢对比利时孖宝一齐放喺正选名单，摆明要同主队驳火，不过佢哋防线少咗重心基斯素文影响甚大，今季佢只缺阵过两场比赛，呢两场波杜塞尔多夫共失11球，今晚作客难保不失，预期呢场会係可观入球骚，求稳嘅可捧中位数2.5球大盘，想好分博埋3.5球大盘都唔过分。