维拉利尔留力护级
周五凌晨另一场欧霸8强次回合，华伦西亚将会返到主场再斗维拉利尔。首回合赢3比1嘅华伦，近期稳步上升，尤其主场势不可挡，呢场对番联赛降班危机未除嘅维拉利尔，有望乘势再下一城，主胜博得过。
（MyTV Gold 802周五凌晨3时直播）
新星古亚迪斯有料到
「蝙蝠军团」首回合靠葡萄牙球星干卡路古亚迪斯大爆发，个人梅开二度帮助球队抢得3比1胜局，攞住3个作客入球喺手，华伦想晋级4强相信问题不大。呢位22岁攻击手上季以借将身份交出超班表现，令人眼前一亮，今季佢正式畀华伦买断做「蝙蝠仔」，不过就等到赛季下半程先发力，近8仗为球队上阵丧入6球，成功激活华伦沉寂咗成季嘅前锋线，呢场对住「黄色潜水艇」嘅脆弱防线，葡萄牙仔随时再有好戏上演。
况且维拉利尔联赛仲要努力为护级奋斗，好难分心兼顾欧霸。「黄色潜艇」好波之人辛迪卡索拉，重伤长抖后复出表现出色，可惜班队友实在唔争气，令佢喺中场孤掌难鸣。球队首回合喺主场都搞唔掂对手，呢场波面对有主场之利嘅华伦，维拉利尔更加难招架，捧番主胜好过。