今晚欧霸8强次回合爆发重头戏，阿仙奴要作客硬撼拿玻里。阿仙奴虽然揸住两粒喺手，但佢哋客场不嬲好「大」喜「攻」，拿玻里为收复失地，已冇退路一定狂攻，势必合演入球骚，2.5球嘅大盘有买趁早。
(myTV Gold 303、Now 643、有线616及656台周五凌晨3时直播)
首回合阿仙奴凭艾朗蓝斯入波及对方摆乌龙，喺主场赢拿玻里2比0先拔头筹，今仗只要打和，或者只输1粒都可晋级，不过「兵工厂」一向主强客弱，近8场正式赛事作客仅得2胜1和5负，包括上2圈欧霸淘汰赛客场输畀实力一般嘅巴迪同雷恩，都只係靠主场上演绝地反击出线，可见作客几咁唔掂，短期内难有改善。
兵工厂客场病未医好
其实，阿仙奴近4仗欧霸淘汰赛共轰9球，有3场开3球或以上，既然「客场病」未医好，倒不如火力全开，博入作客入球逼死拿玻里算数。
落后两粒嘅拿玻里已冇晒退路，为晋级唔单止非胜不可，仲至少要入番2粒先有价讲。不过呢支意甲「2哥」近期入得又失得，联赛连盃赛在内，近7仗入14球但失咗12粒，有5场开3球或以上，前锋米利克同梅顿斯都算弗，问题係今仗焗攻冇得缩，防线随时暴露更多空位，啱晒擅打反击嘅阿仙奴双锋奥巴美扬同拿卡锡迪，2.5球嘅入球大乃不二之选。