今晚另一场8强次回合，波图返主场再斗利物浦。攞住两球优势喺手嘅「红军」，最紧要唔好出现失波；波图为保留晋级最后一线生机，初段亦唔想畀「利记」拎到作客入球，两军各有顾忌下，半场和捧得过。
（无綫myTV Gold 800；Now 644、有线602及662台周四凌晨3时直播）
双线争冠要保留体力
利物浦首回合靠拿比基达同罗拔图法明奴嘅入波，技术性KO波图，次回合就算输1球都可以晋级4强，优势极大，作客情况下相信「红军」初段会睇定啲嚟踢，尽量将个节奏拖慢。查实「红军」今届欧联4次作客只係取1胜3负，全部上半场从未试过领先对手，明显入局较慢，加上佢哋刚喺英超2比0砌低车路士，继续同曼城咬住上，双线争冠下最紧要识保留体力，今仗未必一开波就抢。
主队波图有好消息，中坚比比及防守中场赫达靴里拉齐齐刑满复出，中后场阵容完整番，不过佢哋班射手对住滴水不漏嘅「红军」防线，好难咬得入，加上球队今届4场欧联主场有3次同对手开半场和，值得再追。