比起冠军、前4及神射手，今季英超护级形势似乎较明朗，今晚深夜场补赛名副其实护级大战，排第17位嘅白礼顿主场斗排第18嘅卡迪夫城，白礼顿联赛加盃赛4连败兼冇入波，加上今场和波对佢哋冇坏，战意及决心不及非胜不可嘅卡迪夫城，波童捧让球客胜。
（Now 621周三凌晨2时45分直播）
白礼顿近4仗全败难靠
由于排14位至16位嘅般尼、纽卡素及修咸顿上轮联赛齐齐赢波，边队陪富咸及哈特斯菲尔德降班，相信不离今场两队。白礼顿现时比「卡城」多5分兼踢少1场，今场只要唔输仲有一定优势，不过佢哋对上4场全败兼冇入波，状态极曳，上场对般尼茅夫仲因少打一人而吞够5蛋，对体力及信心肯定有影响，主场出击亦未必会压得太上。
卡迪夫城近3场先后输畀车路士、曼城及般尼，不过对「车仔」及般尼都出现争议判决，先係「车仔」靠一个明显越位入波追和跟手赢埋：上次对般尼原本对方手球获判12码，点知球证「弹弓手」推翻判决，结果错失追和机会兼输多粒，两场输波冇分落袋都有啲欠运。「卡城」馀下比赛仲要斗争标嘅利物浦及争前4嘅曼联，今场输波几可提早举白旗；两军近7次交锋「卡城」只输过1次，受让捧让球客胜。