苏B重返福地再创奇迹？
今晚深夜欧联8强续演梦幻对决，巴塞隆拿返主场再斗曼联。首回合曼联喺主场输1粒，但主帅苏斯克查重返「奇迹之地」鲁营球场，誓要再做「奇迹男」，狂攻带领红魔绝地反击，不过巴塞主力抖到够，队长美斯更脚风顺到冇朋友，斗攻格局实多波入，2.5球嘅大盘有买趁早。
（myTV Gold 303、Now 643、有线656及616台周三凌晨3时直播）
首回合曼联主场输0比1，全场10次射门冇脚中龙，係14年来首次喺欧联赛事录得0中龙嘅尴尬纪录，明显係主帅苏斯克查改打稳守突击失策，为出线今仗一定主动抢攻。红魔今届主场输、作客赢嘅例子唔少，最爆梗係「苏B」领军后16强对巴黎圣日耳门，首回合主场先输0比2下，作客竟赢番3比1，凭较多作客入球晋级，睇番佢哋近4场欧联作客全开3球或以上，可见红魔经常喺客场大举进攻。20年前喺鲁营举行嘅欧联决赛，曼联于补时连入2球反胜拜仁2比1捧盃，正係靠「苏B」轰入奠胜球，今仗重临「奇迹之地」，誓要再造反胜经典，但左闸劳基梳尔要坐波监，防线存隐忧。
美斯拿杰迪锡抖够搏杀
另一边厢，巴塞队长美斯虽于首回合未有士哥，但佢妙传苏亚雷斯攻门，导致曼联摆乌龙致胜坚关键，呢名球王今季状态大勇，唔单止喺联赛轰入33球，于今届欧联亦有8球进帐，与已出局嘅拜仁箭头罗拔利云度夫斯基并列射手榜「1哥」，脚风超顺。
「地上最强」今届已累积20球，係火力第二强球队，佢哋日前联赛对侯尔斯卡收起美斯、拿杰迪锡等多名主力，抖够迎战曼联，为免重蹈圣日耳门遭红魔大逆转覆辙，就算领先紧1粒返到主场都唔会主守坐以待毙，斗攻格必捧2.5球嘅入球大。