防线残缺欧霸跟尾
今晚英超独脚戏，「6哥」阿仙奴要作客硬撼「大黄蜂」屈福特。阿仙奴一向主强客弱，呢点亦係拖累佢哋嘅联赛成绩，而且表现稳健嘅中坚柏柏斯达夫普路斯今仗要坐波监，加上有欧霸顾虑，让唔起主场硬淨嘅屈福特，让球主胜有买趁早。
（Now 621周二凌晨3时直播）
依家踏入球季关键时刻，未计周日赛事，已沦落「6哥」嘅阿仙奴，仍要为争前4及欧霸冠军拚搏。不过「兵工厂」主、客场表现反差太大，佢哋联赛主场17战赢14仗，但15场联赛作客赢得5场，单计近9仗作客联赛，仅得1胜3和5负，唯一胜仗亦只是击败已笃定降班嘅弱旅哈特斯菲尔德，Big 6球队嚟讲真係曳到冇朋友，难怪艾帅都话要同众将讨论到底客场出现乜嘢问题，总係唔能够用平常心面对。
除此之外，今季喺阿仙奴一柱擎天嘅中坚柏柏斯达夫普路斯要坐波监，冇咗佢坐镇防线，虽然仲有哥斯尼同蒙利尔，但另一个位要焗用时好时坏嘅梅斯达菲，随时成为计时炸弹，何况周中仲要出战欧霸8强次回合作客拿玻里，就算首回合赢咗2比0，不过佢哋作客连巴迪都输，绝对唔稳阵，连同艾朗蓝斯、格列沙加都係好番冇耐，今仗随时留力。
屈福特主场硬淨受让笋
相反，屈福特喺上周英格兰足总盃4强对狼队，喺落后2球下法定时间扳平2比2，加时更以3比2反胜对手杀入决赛，士气大振。睇番两军近4次交手，各得2胜2负不相上下，加上「大黄蜂」主场唔係好虾，近7仗主场联赛，取得4胜2和仅1败，非常硬淨，主场有得受让咁笋，让球主胜值得捧场。