29年未攞过联赛冠军
英超进入最后直路，曼城与利物浦叮噹马头，29年未拎过顶级联赛冠军嘅利物浦，剩番最后5轮比赛最恶啃就係今场斗车路士。乐比相信以红军目前气势，再下一城绝冇问题，反观车仔争欧联席位仲有筹码在手，飢渴感远不及红军，利物浦让半一乐比支持上盘。
（now 621周日晚11时30分直播）
利物浦对上一次顶级联赛捧盃已经係1990年，当时英超仲未成立，球队上下个个恨呢隻盃恨到流晒口水，即使欧联目前形势大好，八强首回合领先波图两粒，相信班球员亦会暂时将盃赛放埋一边，叠埋心水争联赛，毕竟曼城馀下赛程相当难踢，包括要对热刺及曼联，利物浦只要做好自己唔係冇机，利物浦球员饮得领队高普嘅心灵鸡汤多，心态上硬淨咗，最低限度会好过今场对手车路士。
车路士兼顾欧霸输决心
车路士内部立立乱，未踢今轮之前排名第3已算係奇迹，领队沙利不得民心，成日畀自己球迷柴台，「沙利波」由盖世神功变成笑柄，过程只需几个月，最惨係球员内部唔团结，夏萨特下季走人似乎已成定局，阵中冇一个领袖级人马，车仔前途确实令人担心。
睇番车路士今季踢硬仗成绩甚差，尤其係作客更惨不忍睹，对住前列嘅曼城、热刺、阿仙奴、狼队、甚至爱华顿全败，每场起码失两粒，主要原因係沙利战术古板，无论对咩对手战术都一成不变，靠软弱嘅佐真奴费路扼守中场，加埋一条水平走下坡嘅防线，真係好难守得住大勇嘅沙迪奥文尼及重拾射门鞋嘅穆罕默德沙拿。沙利今季馀下任务係力争欧联入场券，但其他对手近期相继失分，令车仔抢分压力大减，加上目前欧霸争标尚算乐观，车仔争来季欧联席位仲有另一途径，决心上唔够绝无退路嘅利物浦！