汉诺威主场迎战慕逊加柏，今场我哋安排咗英语旁述，两军近期战绩都差，但相比之下慕逊加柏不但人脚实力远胜主队，上轮赛和大勇嘅云达不来梅，睇到状态同士气都有起色，今晚遇上降班胆汉诺威係反弹黄金机会，慕逊加柏让半一要捧上盘。
（on.cc东网周六晚9时30分直播）
慕逊加柏近况令人失望，近8场德甲只係作客赢过缅恩斯1粒，其馀7战3和4负，已经由联赛榜次席跌到落第5位，莫讲话下届欧联参赛资格处于被动位置，剩低6轮联赛若冇起色，连欧霸参赛资格都有危机，会方较早前公布，同教练赫基嘅合作到季尾为止，下季会换新帅，赫基坦言对此感到唔开心，但会方已经公布解释，换帅係为会方长远发展着想，对赫基佢哋係唔太满意，但仍心存感激，所以冇即时炒佢，球队经历连场低潮后，上轮主场对今年不败嘅云达不来梅表现终于重现生气，最终虽然畀对手逼和，但状态同斗心都好番好多，今晚面对降班胆，有充足决心重响胜鼓。
汉诺威已为降班做准备
汉诺威可以话德甲最弱球队，近月不停地震，球会高层经过大选换晒班，早前炒埋经理海特，现任教头杜迪领军后德甲成绩只係1胜8负，球队不经不觉已经7连败，联赛榜包尾落后尾3嘅史特加7分，会方亦已经打定输数，讲明开始为下届喺德乙做准备，依家唔炒杜迪只係因为唔想再浪费金钱赔偿畀佢，但下季佢已经唔係会方计划之内，呢班波近期其实已经每战必拚，可惜质庸体能差，场场搏到尾段都自动崩溃，今晚难逃8连败厄运。