争前4唔放过韦斯咸
英超榜首双雄周日晚先有比赛，今晚焦点落喺前4之争，依家形势最恶劣嘅「红魔」曼联会喺尾场迎战「锤仔帮」韦斯咸。曼联争入前4绝对1分都不能少，不过佢哋今场残阵出击，而且「红魔」近9场主场联赛只有1场冇失波，随时畀冇心理包袱嘅锤仔偷到鸡，曼联让一球、球半唔抵玩，转捧2.5球大盘最稳阵。
（Now 621周日凌晨零时30分直播）
今季英超之争史无前例咁激烈，除利物浦、曼城喺榜首你追我赶，车路士、热刺、阿仙奴及曼联为来届欧联入场券亦斗得难分难解，现时排第6位嘅曼联失分最多，而且馀下赛程仲要硬撼曼城及车路士，就算下周中要作客巴塞隆拿应付欧联8强次回合，今场亦冇退路一定要搏。不过曼联今场有正选左右闸艾舒利杨格及劳基梳尔停赛，路尔斯华伦西亚、达美安亦伤愈冇耐，防线兵源告急，而且曼联近9场主场联赛只有1场保持清白身，面对富咸、哈特斯菲尔德、白礼顿及般尼等下游分子都有失波，今仗要淨胜2球开上盘绝对唔易。
韦斯咸冇包袱斗攻
韦斯咸上场0比2不敌车路士，近7场作客联赛1和6负，状态麻麻，佢哋依家排喺联赛榜第11位，既冇降班威胁，争欧洲赛资格又未轮到佢哋，冇抢分压力可放开手脚与曼联斗攻。论人脚韦斯咸其实唔曳，前锋阿拿奥杜域、中场菲腊安达臣及兰仙尼都係极具个人能力嘅技术型球员，今季崛起嘅国家队新星迪格兰赖斯攻守兼备，包括曼联在内嘅多间大球会都想将佢收归旗下，仲有「小豌豆」查维亚靴南迪斯倒戈重返奥脱福，就算球队未能打破今季联赛作客Big6必败嘅定律，要喺表现欠稳嘅曼联防线攞到入波绝非奇事，大细中位数2.5球嘅大盘咪错过。