苏B蜜月期过跌晒Watt
今晚欧联8强首回合上演梦幻对决，曼联主场火併巴塞隆拿。红魔主帅苏斯克查与球队蜜月期已过，表现明显跌Watt，而且巴塞近年欧联造访英超未惊过，仲有「英超头号杀手」美斯压阵，曼联真係凶多吉少，巴塞让平半，一于捧上盘。
（myTV Gold 303、Now 643、有线656及616台周四凌晨3时直播）
曼联上年年尾怒炒摩连奴，委任苏斯克查为看守领队后连场报捷，包括在欧联16强首回合主场输0比2下，作客竟反胜巴黎圣日耳门3比1，凭较多作客入球奇迹晋级，令「苏B」终获坐正。不过，红魔之后明显跌Watt，近4场输咗3场，包括喺联赛及英格兰足总盃8强两度不敌狼队，王牌保罗普巴近期冇晒料到，睇嚟新帅效应已过。除此之外，门神迪基亚、中场桑马达及安达靴里拉等续约问题至今仍未解决，其中桑马达更获今场对手巴塞青睐，虽然佢话明唔会理咁多，但对军心点都有影响。
美斯係英超头号杀手
另边厢，巴塞愈嚟愈弗，近9场豪取8胜1和佳绩，包括喺欧联16强以5比1淘汰里昂。球王美斯更係弗到冇朋友，近7场狂轰10球，呢位队长之前30次斗英超球队，总共攻入22粒，其中喺2009及2011年欧联决赛两斗曼联都有士哥，「英超头号杀手」并非浪得虚名。加上巴塞近6次喺欧联作客英超球队，取得4胜1和1负，明显格食格，两军状态一高一低，日前「苏B」去西班牙吼路，睇完巴塞赢马体会场波苦瓜乾咁嘅样，似乎冇乜计，巴塞只让平半，宁买当头起，一于撑上盘。