周三凌晨欧联8强首回合爆发英超内讧，由热刺主场硬撼曼城。曼城擅于先发制人，锋线如史达宁、利莱辛尼均状态大勇，射手阿古路更有机会复出，如虎添翼，加上近年交手曼城食住热刺，1.68倍客W热得有道理。
（myTV Gold303、Now 643、有线656及616周三凌晨3时直播）
刚搬进新主场嘅热刺，「新屋」首骚轻取水晶宫2比0，略有冲喜作用，但近7场仅得2胜1和4负，气势回落，呢7场就喺哈利卡尼伤愈之后嘅成绩，英国传媒统计，呢7场哈利入4球，但就限制咗另一名攻击球员孙兴民发挥，「哈神」养伤时，孙兴民4场入4球，而且热刺呢4场赢晒，但哈利卡尼复出后，呢名南韩国脚上阵7场只係喺上仗入过1球。领队普捷天奴如何适当利用2人，将会影响到球队整体发挥，但似乎佢仲未搵到两全其美嘅方法。
至于热刺所谓球场冲喜，曼城中场奇云迪布尼则表示，喺热刺新主场踢波，其实冇乜唔同：「个个人都喺度讲新球场，好似好特别咁，其实队队波都有主场，队队波都有球迷。佢哋（热刺球迷）可能会刺激啲，不过对我嚟讲，喺温布莱踢有8万球迷，喺热刺新球场踢有6万2球迷，分别真係唔大囉！」
近4对赛曼城全胜
剑指4冠王嘅曼城气势如虹，近23战录得21场胜仗，如果计埋联赛盃决赛加时后互射12码击败车仔捧盃，实际上只係输过1场，几近无敌。曼城翼锋史达宁及利莱辛尼今季士哥不断，连同射手阿古路有机会赶及复出，3人包办「蓝月亮」今届欧联26球中嘅12球，火力全开而且曼城近4次对住热刺全胜，包括最近2场作客，心理上佔优，相信首回合可以搞掂热刺，球队可养精蓄锐冲4冠。