防线唔齐人 场场失波
英超前四争持激烈，随着同市宿敌热刺轮空，阿仙奴本周有机会登上今季最高排名，暂时过吓「3哥」瘾，不过理想与现实常有落差，兵工厂今晚作客爱华顿阵容不整，加上摆脱唔到作客必失波定律，乐比建议今场玩大盘稳阵，中位数2.5/3球有1.8倍绝对吸引。
（now 621周日晚9时05分直播）
英超欧联席位得4个，但就有6队争，所以去到呢一刻即使联赛只係剩番5至7轮，形势仲未明朗化，唔好忘记今届欧联欧霸成绩，都会影响到欧联席位分配，如果咁跷英超球队同时夺得欧联及欧霸，而以上球队又未能夺得英超前四嘅话，最终联赛第4名都冇得参加来季欧联，因为欧洲足协早已表明，英超嘅欧联席位最多只有5个，如遇到此情况下联赛第4亦只能忍痛割爱。
言归正传，今场波照计力争上游嘅阿仙奴动力就一定大啲，毕竟排第10嘅爱华顿季尾亦有权打风流波，论近况阿仙奴亦真係好，联赛近6仗5胜1和，当中主场杀退曼联亦有说服力，不过阿仙奴今季始终摆脱唔到防线不稳嘅陋习，联赛作客踢咗14仗场场都有失波，係英超唯一一队作客冇保持过清白身球队，当中有11场总入球3球或以上，所以今场玩大盘绝对好过玩盘。事实上阿仙奴今仗阵容不整，除今季表现突出嘅防中卢卡斯托拉拿继续停赛，格列沙加及哥斯尼又有伤，上阵机会亦唔乐观，冇咗呢几位中后场大将，令原本已不稳嘅阿仙奴防线更添几分隐忧。
对爱华顿特别多波入
至于爱华顿今季火力亦得到提升，现时联赛入45球已多过上季，连班纳特安尼斯奥上仗都开斋，加埋全季大勇嘅李察利臣、基菲尔施古臣同卡维特利云，要喺脆弱嘅阿仙奴防线身上取得入球并唔难。值得留意係呢个对赛特别多波入，阿仙奴射入过爱华顿大门107次，係英超史上两支球队对赛嘅最高纪录，而上季交手阿仙奴分别大胜5比1及5比2亦令人津津乐道，今场随时再出现大量入球。