嚟紧又欧联最紧要识留
今晚西甲激爆榜首战，「1哥」巴塞隆拿主场迎击「2哥」马德里体育会。巴塞依家联赛优势明显，为留力嚟紧下周中欧联8强斗曼联，今场首要目标保住唔输，唔使去得太尽；马体会踢法守优于攻，加上箭头迪亚高哥斯达及艾华路莫拉达缺阵，锋力更弱，捧中位数2.5球入球细啱数。
（Now 632周日凌晨2时45分直播）
力争衞冕嘅巴塞，今季基本上冇点受过大考验，暂时以8分领先次席马体会。不过「地上最强」要兼顾欧联战线，近期恶战连场，球员点留放相当紧要。周中快车辛苦逼和维拉利尔4比4一役，本来想畀队长美斯抖抖，先做后备，但最终都係换佢出嚟救命，真係冇佢唔掂搞到佢攰爆，加上下周欧联8强首回合又要远征英伦斗曼联，今晚对住马体会冇必要去尽赢波。上仗美斯再次凭罚球建功，状态唔曳，可惜翼锋奥士文尼迪比利未好番，拍档苏亚雷斯亦难复当年勇，单靠美斯单打独斗，面对防守向来硬淨嘅马体会，巴塞要入波确实有啲难度。
「双达」缺阵马体会难入波
马体会主帅施蒙尼带队多年，建立一套打不死铁血风格，今季硬朗依然，以门神奥比历、乌拉圭双雄高甸及荷西基文尼斯为首嘅铜牆铁壁，仅失19球係联赛防守最强一队，惟现时落后巴塞太多，想后上封王今晚必定要尽擸3分。可惜迪亚高哥斯达早前复出后又伤过，今场肯定无缘披甲，另一箭头艾华路莫拉达亦因伤倦勤，单靠法国射手基沙文，好难恶得出样。
翻查往绩，两军近5次交锋属高手过招，合共只炮製10个士哥咁大把，当中有4次总入球开2球或以下，相信今场唔会有突破性发展，中位数2.5球入球细相当好路。