87亿新主场今晚首骚
热刺球迷等到颈都长，可容纳超过62,000人、耗资8亿5,000万镑（约87亿港元）嘅新主场正式启用，首场英超会係今晚斗水晶宫嘅伦敦打吡。热刺近5场联赛1和4负，保「前4」形势急转直下，球队为咗起新球场搞到冇钱买人，如果冇埋下届欧联参赛资格，绝对称得上灾难，信热刺反弹赢波为新球场揭幕赠兴，让一球照捧上盘！
（Now 622周四凌晨2时45分直播）
热刺新球场早喺2015年开始动工，连同周边发展及建设，整个工程花费达87亿港元，为减省开支，热刺成为英超史上首支全季冇买新球员嘅球队，喺多条战线摧残下，一众主力搏到季尾终于疲态毕露，近6场比赛除欧联击败多蒙特，其馀5仗联赛只得1分，争入前4变得告急。热刺上场对利物浦表现其实唔差，如果唔係穆沙施素高及迪利阿里比赛尾段先后失机，有权抢分落袋。睇番佢哋对上5场联赛有4场作客，当中包括斗车路士、利物浦两支Big 6，输波属非战之罪，为求反弹今场肯定搏甩髀。
近7次联赛碰头 水晶宫全败
热刺上季开始借用温布莱球场踢联赛，经过一个半球季「流离失所」，今晚终于「回归」主场出战。新球场可容纳62,000名观众，仅次于曼联奥脱福，普捷天奴就话球队能够喺主场球迷打气下踢出最佳水准。水晶宫上场护级大战击败哈特斯菲尔德，直接送对手降班，自己亦以36分升上联赛榜13位，领先「尾3」卡迪夫城8分，压力大减，加上近7次联赛对热刺输晒，热刺上盘捧得过。