留力周日足总盃决赛
英超加开快车，周三凌晨重头戏曼联作客狼队。曼联早前被狼队喺英足盃8强淘汰出局，不过此一时、彼一时，曼联领队苏斯克查终获正式合约，如今「红魔」上下士气正盛，最重要嘅係，狼队周日要出战英足盃4强，全副心机放晒嗰场比赛，肯定会留力，今晚送个顺水人情畀苏B做上任贺礼又何妨，曼联让半一上盘抵玩。
（Now 621周三凌晨2时45分直播 ）
其实呢场波双方目标都好明确，曼联要争前4，狼队就联赛冇嘢好争，以佢哋今季投资，现时联赛排第7绝对收货，足总盃入4强就几大都争盃，爆冷捧盃就真係一大成就，所以今场英超，最重要係齐齐整整过完90分钟，留力周日场盃赛尽砌。
曼联宣布苏斯克查「坐正」后，即一洗早前颓风，上场联赛以2比1击败屈福特，「红魔」现时同热刺同得61分，领先阿仙奴及车路士1分，争入前4仍未可鬆懈。赢屈福特嗰场拉舒福特同安东尼马迪尔各建一功，2名射手入球数字达到10球，连同保罗普巴(11球)及卢卡古(12球)，曼联同时有4名球员入10球或以上，上次曼联「多点开花」已经係1995至96年球季，当时係简东拿、杰斯、高尔同史高斯。
苏B领曼联作客7战6胜
苏B轮换得宜，各人得到充份休息之馀，又有足够上阵时间，球队相处融洽，肯为佢搏命，所以唔需要担心作客，单计联赛，苏斯克查领军7场作客只曾不敌阿仙奴，其馀6场全胜，对住狼队都唔怕。
狼队今季遇强愈强，联赛加盃赛11次斗Big6共取得4胜4和3负，不过狼队本周日要与屈福特于英足盃4强交锋争入决赛，为免增添伤兵或消耗过多，就算领队纽奴唔採取轮换，落场球员亦难免有顾虑，上场联赛便以0比2不敌护级分子般尼，今次面对急切抢分嘅曼联，料凶多吉少。