国际赛窒住染埋FIFA病毒
周二凌晨英超独脚戏，阿仙奴主场斗纽卡素。兵工厂喺艾美利带领下表现渐入佳境，不过经过突如其来嘅国际赛期，磨合多时嘅默契难免会被打乱，难炒近期表现唔错嘅「喜鹊」，阿仙奴让球1球、球半捧下盘。
（Now 621周二凌晨3时直播）
兵工厂继早前联赛击败死敌曼联，为红魔新领队苏斯克查赠兴，送上挪威人接手曼联后联赛首败后，再喺欧霸16强次回合上演大逆转，淘汰雷恩晋级，一班抢手交出连场好戏，证明领队艾美利渐掌握取胜之道，可惜国际赛期令联赛暂时休战，搞到阿仙奴要抖成半个月至比赛，气势被冲澹，而且艾朗蓝斯同格列沙加两位中场大将为国家队效力期间齐齐染上FIFA病毒整亲，呢场就算踢到都未必可以保证最佳状态，加上卢卡斯托拉拿仲坐紧波监，艾美利要揾番赢波方程式真係要谂谂计。
纽卡素新兵有料到
厂长想全取3分，呢场就要问过佢嘅西班牙同乡宾尼迪斯，宾帅纵横英超多年，虽然率领嘅「喜鹊」整体实力唔算标青，不过贵为「战术大师」，班波有佢睇住表现衰极有谱，今季5次面对伦敦嘅Big6球队，纽卡素全部都只係输1球咁大把。另外新兵米基尔阿米朗表现同样值得留意，呢位巴拉圭中场虽然身材输蚀，不过靠球技同意识搭够，已经证明自己有力喺英超立足，有佢搭住状态几弗嘅前锋荷西朗顿，呢场「喜鹊」随时会有惊喜表现。