至于头场东网都有直播，护级战纽伦堡主场斗奥格斯堡，联赛剩低最后8轮，包尾嘅纽伦堡落后尾3嘅史特加7分，想抢护级附加赛资格未来每场都係决赛，尤其今仗主场对同级对手，势必背城借一力争3分，遇上刚赢波护级压力大减，作客又唔掂嘅奥格斯堡，单睇决心已赢晒，仲有受让平半之利，黑柴推介纽伦堡下盘。
（on.cc东网周六晚10时30分直播）
沦落到包尾，纽伦堡当然实力有限，佢哋季中见形势不利，高层已经嚟过一次大革命，整个领导层包括体育总监同成个教练组都被炒，由二队教练舒贺马斯顶上做临时主帅，呢位少帅上任后，球队整体表现同精神面貌其实有好大改善，虽然单睇成绩，佢上任5场比赛只得1分，但首仗作客西法伦球场守和1哥多蒙特已一鸣惊人，防线组织严密近乎滴水不漏，可惜次仗主场对杜塞尔多夫当黑，开波仅4分钟已踢少个，但都能够领先半场，最后捱唔到尾但人少打人多表现一啲都唔差，近3仗喺伤停问题严重下分别出战劲旅莱比锡、贺芬咸同法兰克福都係仅输1粒，今晚重返主场兼伤疲尽起，守将利保特同中场马图斯佩雷拉都停满复出，遇上上轮险胜弱旅汉诺威表现麻麻，近8场作客赛事未赢过嘅奥格斯堡，纽伦堡有权大变身，下盘甚至主W都值博。