守优于攻Vs决心不败
今晚欧洲国家盃外围赛爆发超级大战，C组荷兰喺阿姆斯特丹告鲁夫球场迎战德国，荷兰近况同对赛近绩都佔绝对优势，再有主场之利自然备受睇好，不过德军今仗赔率坚硬淨，作客都企硬平手盘，黑柴相信佢哋力求不败嘅决心更胜荷兰，预期会係一场恶战，建议冷敲3.3倍和波。
（有线662及602台、香港开电视77台周一凌晨3时45分直播）
荷兰上周中啱啱喺欧国外轻鬆旗开得胜，佢哋去年欧洲国家联赛两度同德国交手都佔上风，去年10月又係喺呢个球场大胜德军3蛋，继而11月作客德国半场落后两球劣势下都可以扳平，心理上当然唔惊德国，球队近3次主场赛事分别轻取德国、法国同白俄罗斯，全部都保持清白之身，防线一对中坚华基尔云迪积克同马菲斯迪历特级数状态都处于高峰，不过前线整体实力仍有瑕疵，效力里昂嘅迪比已经係最孭飞攻击手，可惜拍档昆斯普美斯同赖恩巴布都远远及唔上世界级，今晚要强攻实力决心兼备嘅德国，未必可以再攞到着数。
德军推倒重来输唔起
德国经历世盃同欧国联耻辱惨败后，领队勒夫宣布踢走3位拜仁老将，彻底推倒重来决心毋庸置疑，但太急于改变亦惹起传媒同球迷强烈质疑，今场一旦输波肯定又会惹嚟千夫所指。德军上周中喺主场只能逼和塞尔维亚，但睇番过程确佔上风，该役以年轻球员挂帅，正选阵容只剩得门将纽亚一位2014世盃冠军功臣，球队行军的确快速咗好多，但经验不足搞到半场落后，下半场老大哥马高列奥斯落场总算带番起队波，若非迪姆华拿痛失良机应可反胜，今晚仲有另一位老大哥却奥斯蓄锐担正，预期会有更进一步演出，佢哋计人脚级数唔会比荷兰差，加上战意鲜明，今晚再访阿姆斯特丹几大都唔想输！基于同组另外3队北爱尔兰、爱沙尼亚同白俄罗斯实在太弱，荷德两军根本唔使担心出线问题，呢场大战和波係双方都可以接受嘅赛果。