护级豁出去Vs冲冠搏命追
英超进入最后直路，争标同护级形势同样激烈，第二位嘅利物浦暂落后曼城1分，未来8仗场场都要当决赛踢，至于尾二嘅富咸逐渐被放甩，踢法上早已豁出去同你搏命，两队目标鲜明，今场开大机会高，乐比捧3/3.5球大盘。
（Now 621周日晚10时15分直播）
富咸今季已先后用过三位领队，嚟到看守领队柏加，管理层嘅意思明显不过，就係畀呢位冇乜经验嘅少帅放手一搏，反正护级机会唔大，倒不如兵行险着，睇吓会唔会有奇迹出现。
其实柏加上任以来两仗表现唔错，起码畀人感觉係球员拚搏，精神可嘉先，虽然最终分别以1比2不敌车仔同埋1比3输畀李斯特城，但主要问题係条豆腐防线太软弱，进攻其实算交到货。
富咸失68球英超最多
事实上，富咸前线不乏好手，甚至可以话係英超中下游球会都希望拥有嘅可靠前线，阿历山大米祖域绝对称得上係一名全面射手，赖恩巴布，舒贺尔尼实力犹在，加上新秀赖恩施斯隆嘅冲劲，前线入波唔成问题，最得人惊嘅係防线，今季失68球係英超之冠，后防由右至左表现冇个合格，今季主场仅得对包尾嘅哈特斯菲尔德冇失波。
至于利物浦唔使多讲，进入最后直路基本上开行turbo，虽然计近况红军略有回落，但由榜首跌番落次席压力稍减，后上对佢哋嚟讲发挥会更佳，力争神射手嘅穆罕默德沙拿近期入球略减，不过拍挡沙迪奥文尼入球停不了，近8场联赛入8球，虽然赛前话佢有少少伤，不过利记前线仍有法明奴，奥历治，史杜列治等人，即使轮换影响亦未必大，上场联赛喺落后嘅情况后反胜般尼4比2，今场随时又会出现类似嘅大手交易场面。